Btc roulette

القائمة الرئيسية

الصفحات

مدارس ستيم STEM ...شروط القبول والاماكن والمميزات والعيوب والكليات المتاحة

مدارس ستيم STEM ...شروط القبول والاماكن والمميزات والعيوب والكليات المتاحة 

مدارس ستيم STEM ...شروط القبول والاماكن والمميزات والعيوب


مدارس ستيم STEM ...شروط القبول والاماكن والمميزات والعيوب والكليات المتاحة من اكثرالموضوعات التى يبحث عنها طلبة الشهادة الاعدادية ، وسوف نقدم لكم فى هذه المقالة كل التفاصيل عن مدارس ستيم STEM، نقدمه لكم على مدونة مصر التعليمية ونتمنى ان ينال اعجابكم .

 أول حاجه لازم تعرفها ان المدارس دي داخلية (هتروح الاحد وترجع الخميس) ومناسبة اكتر للناس اللي حابة تدخل علمي.

أماكن المدرسة

_____________

المعادي - اكتوبر - الإسكندرية - الدقهلية - كفر الشيخ - أسيوط - الإسماعيلية - الأقصر - البحر الأحمر - الغربية - المنوفية - الشرقية - العبور - قنا - بني سويف - المنيا - سوهاج - الفيوم - السادات.

وبيفتحوا كل سنه مدارس ف محافظات تانية.


نظام التعليم

المدارس دي هدفها انها تلغي نظام الحفظ والتلقين، فهي معتمدة اعتماد كلي علي الفهم والبحث والتطبيق. يعني بتخلق باحث مش مجرد طالب.

ودا معناه أن مفيش لا مناهج ولا كتب، كل طالب بيستلم لابتوب اول سنة وبيسلمه للمدرسة تاني في اخر سنه، والمناهج عبارة عن موضوعات رئيسية الطلبة بتتوسع فيها من خلال البحث وجمع المعلومات من الانترنت والمراجع....الخ. + أن الدراسة ف STEM باللغة الإنجليزية.

الكليات المتاحة

______________

لو دخلت علمي علوم متاح قدامك كليات الطب بكل أنواعه (طب - علاج طبيعي - صيدليه - علوم )

ولو دخلت علمي رياضة متاح ليك ( هندسة بمجالاتها - حاسبات ومعلومات )

شروط التقديم

______________

اي طالب يقدر يدخل STEM لو جايب ٩٨٪ ومقفل مادة واحدة من ( انجليزي - رياضيات - علوم )

أو لو جايب ٩٥٪ ومقفل مادتين من ( انجليزي - رياضيات - علوم )

امتحان القبول

_____________

بيكون عبارة عن أسئلة MCQ في أربع مواد ( Math - Sciences - English - IQ )

مميزات المدرسة

_______________

• النظام هناك هيغيرلك طريقة تفكيرك ومذاكرتك.

• بعدك عن اهلك هيعلمك تتعلم المسئولية.

• في فرصة أن يجيلك منح من برا مصر.

عيوب المدرسة

______________

• أن المدرسة داخلية.

• لو بتحب المواد الأدبية فالمدرسة دي مش ليك، بلاش تدخلها لأنها مفيهاش أدبي أصلاً.

• النسبة المرنه ودي عبارة عن عدد المقاعد المتوفرة لطلاب STEM في كل كلية واللي بتتحسب كالتالي: (عدد طلاب ستيم ÷ عدد طلاب ثانوي عام) × عدد المقاعد المتوفرة في الكلية

بس عامةً محدش بيدخل أقل من علوم.

• لو حاطط عينك علي كلية معينة ممكن ينتهي بيك الحال في كلية تانية خالص حتي لو جايب مجموع عالي ودا بسبب النسبة المرنة.

✍️ س: مش فاهمة يعني ايه النسبة المرنة....وهل بيكون للطالب ميزة عن الثانوي العام في تنسيق الكليات خاصة ان للامتحانات اصعب

ج :للاسف العكس تماما الأفضلية ف معظم الجامعات بتكون للثانوي العام ونسبة مقاعد محدودة لمدارس STEM لكل كلية، لكن الاكيد ان طالب ستيم مش هيدخل أقل من علوم

• في شرط انك لو دخلت STEM وبعدين قررت متكملش، ساعتها هتضطر تدفع للمدرسة كل المصاريف اللي اتصرفت عليك.

دي كل المعلومات اللي المفروض تكون عارفها قبل ما تقرر تقدم في مدارس المتفوقين STEM .

 بالنسبة للمصاريف الاول كانت منحة دراسية، دلوقتي بقت بـ3 آلاف جنيه أول السنة شاملة تأمين اللاب اللي بتستلموه اول سنه، ولما بتتخرج من المدرسة بترجعه وتاخد نص مبلغ التأمين.

• بالنسبة لمصاريف طلاب المدارس الخاصة بيتم دفع نفس المبلغ المسدد بالصف الثالث الإعدادي ف مدرسته + تأمين اللاب.

تعليقات